!يا ليلة العيد

هو أنا ليه مش حاسة بالعيد؟؟ كل ماحد يقولي كل سنة وانتي طيبة أو عيد مبارك أو أي عبارة تهنئة أخرى بقولهم وانتوا طيبيييييين وبمد فيها كده بالضبط وأحط وش مبتسم قال يعني بقى مبسوطة  بس لأ أنا بحاول أبسط نفسي مش أكتر يمكن أحس إني مبسوطة فعلا

  الواحد بدأ ميحسش بـرمضان ودلوقتي بقى العيد كمان والموضوع ده بدأ من 3 سنين يمكن وكل مرة أقول أنا مش حاسة بـرمضان السنة ديه بس ماكنتش فاكرة إن الموضوع هيطول  للسنة اللي بعدها ويا ترى الموضوع ده سببه إيه؟؟
ممكن عشان الواحد بيكبر؟ ممكن أسأل بنت خالتي الصغيرة هي حاسة بالعيد ولا لأ؟؟ هو السؤال ده مفهوم لسنهم أصلا؟؟

طب إيه…أنا حتى لسة مسمعتش  أي حد بيفرقع بمب ولا بكرة هايبتدوا؟؟ بس الناس مبتقدرش تستنى أصلا , صحيح كده أحسن الواحد كان بيخاف ينزل الشارع ويفضل يتخض في النازلة الواحدة أكتر من عشر مرات منهم لله!!ولا يمكن مصر أصلا فقدت روح رمضان والعيد حصّله؟

أصلا الشارع مبقاش يفتح النفس إن الواحد ينزله! سواء كان بسبب الزبالة اللي مرمية في كل حتة… وده المشهد اللي بيحصل وانا نازلة الجامعة الصبح أنزل من عالرصيف وانا مستعجلة مش واخدة بالي اعدي جنب حاجة مرمية عالأرض وألاقي كمية دبان طلع قدامي …عارفين في الأفلام لما بيترمي glitter ويعمل؟؟ شيله الجليتر وحطوا مكانه دبان منظر لا يوصف 🙂 فعلا بأحس إني عايزة أضحك لما بفكر فيها من الناحية ديه

أو الناس اللي مش بتبقى في حالها والواحد بيكون نازل من بيته بيقول يا ترى كام واحد هيعاكس انهرده والواحد يكون نفسه يرد عليهم بس لأ الناس بتقول مينفعش يترد عليهم يا إما الموضوع مش هيجيب آخر ويفتكرو إنك عايزة تتكلمي معاهم أو هاسمع الفاظ مش ولابد منهم إن أكيد المعجم اللغوي بتعاهم أكبر من بتاعي  فـاسيبهم يقولوا اللي عايزين يقوله وانا بغلي من جوه نفِسي اشتمهم أو أقول للراجل اللي أكبر من بابايا احترم سنّك يا حاج!!

بيتهيألي الظاهرة ديه مش هتخلص غير لو نفجّر مصر بس نخلّي على جنب الناس المحترمة عشان دول يبدأوا مصر من أول وجديد

إحساس وحش قوي إن الواحد مينفعش ينزل يتمشى  في الشارع كده أو مش سهل الموضوع إنك لو عايز تنزل تشم هوا , لأ الهوا هنا مينفعش يتشم صحيح طيب بلاش نقول تشم هوا خليها to relax your mind
فـهترجع البيت تكون مش طايق نفسك أكتر أو يمكن الموضوع ده صحيح أسهل للولاد أكتر من البنات مع إن  الولاد ممكن بـكل بساطة حد يطلعله مطوة -والموضوع ده بقى منتشر لدرجة إن بعد فترة هنبدأ نقول آه صحيح مش امبارح واحد طلعلي مطوة ويبقى موضوع عادي بنقوله في وسط الكلام ..

لو أنا في بلدي مش عارفة أنزل اتمشى في الشارع بس اللي هو مفروض حاجة بسيطة جدا ومش بطلب كتير !! هتمشى فين؟؟ ويا سلام كمان لو أقدر أسوء عجل براحتي!!

صحيح أنا مش بعرف اركب عجل بس خلوا الموضوع يبقى سهل في مصر و هاتعلم و أسوق  عجل كل يوم لأي خروجة أنا رايحاها!
قد إيه فعلا كنت بحقد عالألمان لما كنت هناك وانا شايفهم رايحين جايين بالعجل واللي ملون  عجلته  أو حاطتله ورده ومركب الكلب بتاعه معاه كمان! وألاقي عائلة من أرْبع أشخاص كلهم راكبين عجل!

وفعلا أنا كنت بأنزل اتمشى كل يوم لحد مارجلي كانت بتوجعني  بس مرضتش افوت يوم من غير ماأنزل عشان عارفة إني هارجع مصر مش هتمشى براحتي تاني واليوم اللي كانت رجلي بتوجعني فيه قوي وقلت خلاص أقعد انهرده وأبقى أنزل بكرة اتضايقت ورحت نازلة  الساعة4 الفجر …

كان إحساس غريب قوي وانا ماشية بأقول لأ أكيد في حاجة هتحصل أكيد هلاقي حد طلعلي بـمطوة ولا حاجة يقولي طلعي اللي معاكي يا اما حد هيكلمني على أساس اللي هيكون في الشارع الوقت ده هيكون سكران بس لأ برده .. اشمعنى طيب هم يكونوا عايشين كده واحنا لأ؟ وانا مش مثلا بأقول اشمعنى هم راكبين porsche واحنا لأ (مع إن مش هأقول لأ خالص لو جاتلي واحدة) ؟ أنا بأقول اشمعنى هم يمشوا  في الشارع براحتهم ويركبوا عجل ويكون في lane مخصصة للعجل أصلا واحنا لأ وليه كل واحد هناك في حاله وهنا كل واحد حشر نفسه مع التاني سواء شاء أم أبيَ!! وحاجات تانية كتير أكيد مش في بالي دلوقتي …

  برضوا معرفتش روح العيد هربت على فين؟ ولا أنا لوحدي اللي حاسة كده؟؟

Advertisements

2 Comments (+add yours?)

  1. bahey
    Nov 06, 2011 @ 02:09:18

    أنا بطلت أحس بالعيد من اول ما المجتمع قرر أنى كبرت على العيدية.. موتوا الفرحة جوايا 🙂

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Enter your email address to subscribe and receive notifications of new posts by email.

Join 136 other followers

%d bloggers like this: